Orfeon Donostiarra abesbatzak kontzertua emanen du agorrilaren 6an Senperen

Ttipi-Ttapa 2022ko abu. 4a, 18:00
125. urteurrena ospatzen ari da Donostiako Orfeoia eta Senpereko elizan eskainiko du emanaldia.

Larunbatean 21:00etan elizan 80 abeslari baino gehiago ariko dira kantari.

Orfeon Donostiarra abesbatzako 80 abeslari baino gehiagok kontzertua emanen dute agorrilaren 6an, larunbatean 21:00etan hasita Senpereko elizan. Senpereko herriko etxeak, Donostiako Musika Hamabostaldiak eta Senpere Kultura eta Ondareak antolatu dute emanaldia. Sartzea 20 euro izanen da helduentzat eta 10 euro hamasei urtez beheitikoentzat. Senpereko Kultura eta Ondarearen egoitzan, Donostiako Kursaalen eta turismo bulegoetan eskura daitezke sarrerak.

Egitaraua

Larunbateko emanaldian XVIII. mendetik gaur egunera bitarteko kantuak abestuko dituzte, honako egile hauenak:

Gabriel Fauré (1848-1924): Requiem en re menor OP. 48, Introito et Kyrie, Ofertorio, Sanctus, Pie Jesu, Agnus Dei et Lux Aeterna, Libera Me, In Paradisum, Cantique de Jean Racine.

Francis Poulenc (1899-1963): Litanies à la Vierge Noire.

Tomás Aragüés (1935-2022): Ave Maria.

Pau Casals (1876-1973): Nigra sum.

Aita Madina (1907-1972): Aita gurea.

 

125 urteko historia

125. urteurrena ospatzen ari da Orfeon Donostiarra abesbatza, 1897an sortu baitzen. Miguel Oñate, Luzuriaga eta Esnaola izan zituen lehen zuzendariak eta 1906ko ekainean lortu zuten bere lehen sari handia Parisen, le Grand Prix Paris. Ondotik Juan Gorostidik zuzendu zuen abesbatza 1968an hil zen arte. Ondotik, Antxon Aiestaran izan zen zuzendari eta 1986tik honat Jose Antonio Sainz.

Kultura Xareta Senpere

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun