Izenpetze ekitaldia hasi aitzin, lehen herri izenpetzaileetako ordezkariek Europako Kontseiluko Claudine Brohy Fribourg/Freiburgo Unibertsitateko hizkuntzalariarekin biltzeko parada izan zuten. Claudine Brohy Doktorea Lurralde hizkuntzen eta hizkuntza gutituen aldeko Eurokartako aditu batzordeko kide izanki Suitzaren izenean, herrietako ordezkariak puntu teknikoen inguruan aritu ziren harekin.
Trukatze horren ondotik, Mizel Hiribarren Itsasuko auzapez Jaunak hitza hartu zuen bertaratu diren guziei ongi etorria egiteko. Oroitarazi zuen Itsasuko Herriari zerrenda lehena izan zela Europako Kontseiluko ordezkariekin harremanetan sartzen, 2020ko herriko bozak aitzin, Tokiko xartari buruzko xehetasunak izateko.
Gero, Euskal Konfederazioko ordezkariak ekimenaren nondik norakoak oroitarazi zituen, baita 2021eko urte hastapenetik orain arte eraman lana ere, hots Tokiko xarta 70 bat herritan eta Euskal Elkargoko lurralde poloetan aurkeztu dutela Euskal Konfederazioak eta Itsasuko euskara batzordeko hautetsiek, herriak euskararen aldeko neurriak hautatzen laguntzeko eranskin bat landu dutela, Xartak herriko kontseiluetan bozkatzeko deliberazio modeloa proposatu dutela...
Oroitarazte horren ondotik, Claudine Brohy Europako Kontseiluko ordezkariak hitza hartu zuen oroitarazteko Tokiko xarta ezinbesteko tresna zela lurralde hizkuntzak babestu eta garatzeko. Xarta horien segipenak Europako Kontseiluarekiko lankidetza ahalbidetzen duela oroitarazi zuen eta beste Estatuetako lurralde kolektibitateak ere desmartxan sartzeko lagungarri izan daitekeela.
Hirugarren hitz hartze horren ondotik 49 herrietako auzapezak eta hautetsiak oholtzara igo ziren, talde ttikika, herriko kontseiluetan onartu Xartak bi aletan ofizialki izenpetzera. Izenpetze tarte honetan zenbait hautetsik beren lekukotasuna eman dute Xarta onartzeko herriko etxe barneko prozedura nola iragan zen jakinaraziz, adibidez.
49 Tokiko xartak izenpeturik eta prentsaren aitzinean Europako Kontseiluko ordezkariaren eskuetan utzirik, Euskal Konfederazioko ordezkariak eta Itsasuko herriko etxekoak oroitarazi zuten izenpetze ekitaldia dinamika zabalagorako abiapuntua besterik ez dela. Horrela, ipar Euskal Herriko herri guziak desmartxan sartzera gomitatu zituzten. Horrez gain, ondoko urratsak zein izanen diren oroitarazi zuten, hala nola Xarten segipenaz arduratuko den Aditu batzordearen osaketa eta ibilmoldea finkatzea. Azkenik, Euskal Elkargoari deialdia luzatu zioten, alde batetik Elkargotik ere ekimenaren promozioa egitea galdegiteko eta, bestetik, Elkargoa ere Aditu batzordeko kide izan dadin, Euskal Konfederazioa eta hautetsi taldearekin batera.
Tokiko Xarta onartu duten lehen 49 herriak
|
1 |
Ahatsa-Altzieta-Bazkazan |
26 |
Irulegi |
|
2 |
Aiherra |
27 |
Isturitze |
|
3 |
Ainhize-Monjolose |
28 |
Itsasu |
|
4 |
Aiziritze-Gamue-Zuhazti |
29 |
Izpura |
|
5 |
Aldude |
30 |
Lakarra |
|
6 |
Aloze-Ziboze-Omize Gaine |
31 |
Lasa |
|
7 |
Amenduze Unaso |
32 |
Lekorne |
|
8 |
Anhauze |
33 |
Lekunberri |
|
9 |
Arrosa |
34 |
Lexantzü-Zunharre |
|
10 |
Azkaine |
35 |
Ligi-Atherei |
|
11 |
Baigorri |
36 |
Luhuso |
|
12 |
Baiona |
37 |
Makea |
|
13 |
Banka |
38 |
Mendibe |
|
14 |
Behorlegi |
39 |
Miarritze |
|
15 |
Bidarrai |
40 |
Ortzaize |
|
16 |
Donamartiri |
41 |
Ozaze-Zühara |
|
17 |
Donapaule |
42 |
Sara |
|
18 |
Duzunaritze-Sarasketa |
43 |
Senpere |
|
19 |
Ezpeleta |
44 |
Suhuskune |
|
20 |
Gabadi |
45 |
Uhart-Hiri |
|
21 |
Gamarte |
46 |
Urepele |
|
22 |
Getaria |
47 |
Urruña |
|
23 |
Haltsu |
48 |
Uztaritze |
|
24 |
Hazparne |
49 |
Ziburu |
|
25 |
Hiriburu |
|
|