Sarako Zangoak Arin elkarteak urriaren 14an egin zuen bere Biltzar Nagusia, Lur Berri gelan. Jean Granet lehendakariak denei ongi etorria egin zien, baita oroitzapena ere mundu honetatik gan diren kideei.
Bruno Dubosq Departamenduko lehendakaria kexu da pandemia honekin laguntza gutiago dutelako elkarteetan, baina Saran ez dute holakorik, emendatu baitzaie eta denak kontent dira. Gero mintzatu ziren aurten egin dituzten aktibitateei buruz, baita heldu den urtekoez ere. Xabi Larregle diruzainak eman zituen urteko kontuak, positiboan, eta horretan bukatu zen bilkura. Ondotik, 60 bat kidek bazkari on bat egin zuten Pikassaria jatetxean, Jean Jacquesek prestatua eguna bukatzeko dena umore onean.
Bulegoan aldaketarik ez
Bulegoa ere bozkatu zuten bainan ez da aldaketarik: Jean Granet lehendakaria, Xabi Larregle diruzaina eta Béatrice Ollivier idazkaria.
Pays Catharerat ateraldia
Aipatzekoa da aitzin horretan Zangoak Arin elkarteko bederatzi kidek egin dutela ateraldi bat Pays Cathare ingurura. Queribus eta Peyrepertuse gazteluak, Galamus ibaiak, arrokan egina den ermita bisitatu dituzte. Pech de Bugarach mendirat (1230m) ere upatu dira. Ateraldi gaitza egin dute eta denak izigarri kontent itzuli dira. Urtero taldeak egiten ditu horrelako ateraldi batzuk.