Beraz, proiektua berritu egin beharko da, hasierako prezioa igan, eta berriz ere lizitaziorat aterako da noizbait. Aipatzekoa da herriko etxearen hiru solairutan egin nahi dituztela lanak. Beheitikoan, bi sarbide bereizi egin nahi dituzte, bat ostatu-jatetxera sartzeko eta bertzea, udal bulegoetara joateko. Gaur egun bigarren solairuan dauden udal bulegoak lehenbiziko solairura eraman nahi dituzte eta bigarrenean erabilera anitzeko aretoa egin. Gaur egun duen sabaia kenduta, teilatuak duen zurezko egitura bistan utziko dute. Bigarren solairuan gelatxo ttiki bat ere izanen da, bulego edo biltegi moduan erabiltzeko. Igogailua ere jarriko dute.
Eskola berritua eta Azketa gaineko bidean porlana
Halere, Zugarramurdiko Herriko Etxeak lan pare bat egin ditu uda honetan. Alde batetik, eskolako teilatua aldatu eta kanpoko paretak pintatu, eta bertze aldetik Azketako gaineko aldeko bidea zimendatu. Eskolako lana haundia izan da, eta 58.000 euro kosta da, baina, zorionez, 31.000 euroko dirulaguntza izan da.
Bertzalde, Azketako gaineko aldeko bideko lanak franko presaka egin dira. Gero eta jende gehiago ibiltzen da hortik, eta lurra irristakorra denean arrisku egoerak sortzen omen dira. Beraz, momentuz zimendatu da, eta bertze fase batean harri-xabala emanen zaio.
