Beraien xedeak bete ahal izateko dirua bildu asmoz, uztailean eta agorrilean asteartero-asteartero indar jokoak eta pilota partidak antolatu dituzte Sarako Zazpiak Bat dantza taldeak eta Izarra pilota eta errugbi taldeek Sarako plazan. Zenbaitetan 500 eta 600 sarrera ere saldu dituzte, agorrilean batez ere eta kontent dira. Argazkietan ageri denez, joan den asteartean Sarako bi bikote gazte joko garbin aritu ziren, xisterarekin. Horretaz gain, indar jokoak ere egin zituzten Sunbillako Unai Bertiz eta Esti Gastearenak eta Etxalarko Xabier Ariztegi Santxinek: arpana, harri-jasotzea, aizkora altueran, gurdi-jokoa…