Guardiako medikua falta dutelako elkarretaratzea egin dute Urdazubi eta Zugarramurdiko bizilagunek

Ttipi-Ttapa 2021ko abu. 30a, 10:00
Zugarramurdi eta Urdazubiko hainbat bizilagun bildu ziren Urdazubiko Osasun Etxearen atarian. Argazkia: Fernando Anbustegi

Joan den ortzegunetik mediku bakarra dute kontsultan

Urdazubiko eta Zugarramurdiko hainbat bizilagunek elkarretaratzea egin zuten larunbat eguerdian Urdazubiko Osasun kontsultategiaren atarian, guardiak betetzeko medikurik ez dutela salatzeko. Duela egun batzuk arte hiru mediku zituzten Urdazubiko osasun kontsultan, baina batek erretiroa hartu berri duenez eta bertzea bajarekin dagoenez, gaur gaurkoz mediku bakarra dute. Bizilagunen erranetan, beraz, «honela ezinezkoa da kontsulta eta guardiako asteko ordu guziak betetzea» eta arazo horri soluzioa ematea eskatu dute.

Urdazubi eta Zugarramurdi herri ttikiak dira, 356 eta 217 bizilagunekoak hurrenez hurren, baina hainbat bisitari hartzen dituzte eta bertze hainbatek inguruan lan egiten dute, 500 batek Dantxarineako merkataritza gunena, eta hauek ere artatu behar izaten dituzte Urdazubiko osasun kontsultategian. Ortzegunean gelditu ziren lehen aldiz guardiako medikurik gabe eta asteburu osoan horrelaxe egon dira. Larrialdiak artatzeko erizain batekin bakarrik gelditu da Urdazubiko kontsulta.

Guardiako medikua behar denean, Elizondora bideratzen dituzte eriak, Urdazubiko erdigunetik 20 kilometrora. Baserri auzoetatik oraindik urrunago. Kontu larria balitz, Elizondoko medikua joan beharko litzateke Urdazubi-Zugarramurdira, Baztango zerbitzua murriztuz. Xaretako bizilagunek diotenez, aukera honek ez du deus soluzionatzen, eta gogoratzen dute mediku arreta behar duten aunitzek Elizondora joan ahal izateko arazoak dituzte. Horregatik «soluzioa berehala» eskatu dute, «egiatan larria den zerbait gertatu baino lehen».

Egoera larria dela eta medikua berehala jartzea eskatu zuten. Argazkia: Fernando Anbustegi

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun