Larunbatean Beran abiatu zen suteak 2.000 hektarea inguru erre ditu Nafarroa, Gipuzkoa eta Lapurdi artean. Lapurdiko aldeari dagokionez eta Hego Lapurdiko auzapezek eskaini duten prentsaurrekoan salatu dutenez, Larrun eta Xoldokogaina inguruetan bertze lau tokitan ere sua nahita piztua izan zen.
Euskal Elkargoaren Urruñako egoitzan elkartu dira Sarako Battitta Laborde, Urruñako Filipe Aramendi, Azkaineko Jean-Louis Fournier, Biriatuko Solange Demarcq-Eguiguren eta Ziburuko Eneko Aldana. Jakitera eman dutenez, auzapezek haien herriko etxeen izenean salaketa bana jarriko dutela baieztatu dute. Gogora ekartzekoa da Baionako prokuradoreak jada ikerketa abiatu duela.
Beratik joan zen suteaz gain, Urruñan Ziburumendin, Azkaineko Trabenian bi puntutan eta Saran Larrungo tren ttipiaren ondoan su-pizteak izan zirela baieztatu dute. Bereziki deigarria da azken hau, larunbatean 19.00etan piztua izan baitzen, bertze suetatik hainbat ordutara.