Argi Berri Elkarteak, Ordiziako Udalarekin batera, Lazkao Txiki Bertsopaper Lehiaketa antolatu du. Lanak bildu ondotik, Manu Olano, Nikolas Zeberio eta Izar Sarriegik osatutako epaimahaiak aztertu ditu eta atzo, irailaren 13an, banatu zituzten sariak.
13 urte artekoetan, guztira bortz lan aurkeztu zituzten eta Sarako Unax Aizpurua Ibargarai izan zen irabazlea. Bigarren saria Oreretako Mara Albistur Gurrutxagarentzat izan zen eta hirugarrena Orioko Amaiur Sukia Yabenentzat. Parte-hartzaileek etxetik atera ezina izan zuten gaitzat eta horri erantzun behar izan zioten.
Gazteetan, 14-18 urte artekoetan, zazpi lanen artean, Beasaingo June Aiestaran Iparragirreren 'Parez pare' lana izan zen gailendu zena, Zarauzko Aner Peritz Manterolaren 'Mundura buelta' bigarren eta Hernaniko Garazi Urdangarrin Larreden 'Udako egun batez' hirugarren.
Helduen artean (18 urtetik goitikoak) guztira 21 lan aurkeztu ziren eta Donostiako Manez Mujika Amunarrizen 'Gelan sartu orduko' izan zen epaimahaiak gustukoen izan zuena. Beasaingo Ekaitz Goikoetxea Asurabarrenaren 'Bidean' eta Asteasuko Haritz Mujika Lasaren 'Buruan' izan ziren bigarren eta hirugarrenak, hurrenez hurren.
Sariak
Sari banaketa irailaren 13an, igandean, egin zuten Ordiziako Barrena Kultur Etxean. Sarituek sariak jaso ahala bertsoak kantatu zituzten. Gaztetxoen kategorian 200 euro, 100 eta 50 eman zizkieten sarituei; gazteen kasuan, 300, 200 eta 100 euro jaso zituzten eta helduen artean 500, 400 eta 300. Horrez gain, maila bakoitzeko irabazleek Txikia oroigarria jaso zuten.