Irailaren 1ean, asteartean, Urdazubiko Herriko Etxean zintzilikatu zuten banderaren aitzinean, Geroa Baik «harridura eta kezka» plazaratu nahi izan ditu. Igorritako prentsa-oharrean adierazi dutenez, «Espainiako eta Europako banderak erabakiaren berri eman gabe» zintzilikatu dituzte eta «joan den ortziraleko ohiko batzarrean erabakiaren berri eman ez zutenez, ezkutuan hartutako erabakia» dela aipatu dute.
Udal Gobernuak, Azkar Taldeak eta «bereziki, Iñaki Ariztiaren» erabakiak «harridura» eragin dio Geroa Bairi. «Kezkagarriena», ordea, «Azkar Taldeak Nafarroako eta Urdazubiko banderak ahaztu edo baztertu izana» dela uste dute: «Zertaz? Noiz, nola eta nork hartu du erabakia?».
Erabakiarekin ados ez daudela ageriko egitearekin batera, «Udal Gobernuari eta bereziki azalpenak exijituko» dizkiotela adierazi dute.