Hain zuzen, bihar beteko dira 30 urte Haranburu, Parot eta Esnal espetxeratu zituztenetik eta hala, espetxean noiz arte izanen diren galdetu dute Lannemezango presondegian dauden Euskal Preso Politikoen Kolektiboko kideek. Frantziako estatuari bake prozesua aintzat har dezan eta norabide horretan ekintzak abiatzeko galdegin diote Gobernuari.
Baldintzapeko askatasuna ukatua
Lannemezanen dago preso Haranburu eta 2008az geroztik baldintzapeko askatasuna eskatzeko aukera du. Behin baino gehiagotan egin izan du eskaera baina guztietan ukatu diote. Baldintzapeko askatasunaren azken eskaera joan den urteko maiatzaren 7an aztertu zuten Parisen. Prokuradoreak baldintzapeko askatasuna ez onartzearen alde egin zuen baina defentsa eta gaur egun Haranburu dagoen Lannemezango kartzelako zuzendaria horren alde agertu ziren. Uztailaren 5ean Zigorrak Aplikatzeko Auzitegiak aske uzteko erabakiaren berri eman bazuen ere, Ministerio Publikoak erabakiari helegitea paratu zion eta hala, preso segitzen du.