Mendi lasterketa maite dutenek, horretarako aukera ezin hobea izanen dute asteburu honetan Urdazubin, bi lasterketa antolatu baitituzte gazteek eta Udalak: larunbatean, gaueko lasterketa eta igandean, maratoi erdia.
Gaueko lasterketa
Duela hogei bat urte, proba hau antolatzen hasi zirenei omenaldia eskainiz, 9,5 kilometroko lasterketa eginen dute larunbatean, urriak 19. 19:45ean abiatuko da 500 metroko malda positiboa duen lasterketa.
Maratoi erdia
Igandean, berriz, 22 kilometro eta 1.200 metroko malda duen maratoi erdia eginen dute. 10:00etan abiatuko dira lasterkariak eta tartean, errekak, zubiak, bidexkak, tontorrak eta bertze hainbat txokotatik pasatzeko aukera izanen dute.
Izen-ematea
Parte hartu nahi dutenek play.sport-madness.com atarian eman beharko dute izena. Antolatzaileek iragarri dutenez, kirolariek bi lasterketetan edo bakarrean parte hartzeko aukera izanen dute, eta garai bateko kontrabandistak gogoan, hasierako 500 metroetan eta helmugara sartu aitzineko metroetan zakua bizkarrean eraman beharko dute.
Asteburua borobiltzeko, larunbat gauean hirugiharra eta txistorra eskainiko dituzte eta igandean luntxa parte-hartzaileentzat, horien laguntzaileentzat eta boluntarioentzat. Informazio gehiago nahi duenak Arantxa Blancori galdegin diezaioke, 659 18 94 20ra deituz edo arantxa@sport-madness.es helbidera idatziz.
