Antolatzaileen aurreikuspenen arabera, 16:00ak aldera ailegatuko dira txirrindulariak eskualdera eta 17:20 inguruan bukatuko da etapa. Iñaki Ariztiak, Urdazubiko alkateak, Xorroxin Irratiari adierazi dionez Urdazubiko herri-guneraino ailegatuko dira txirrindulariak: «2016an Dantxarinean bukatu eta bertatik abitu zen etapa bat. Oraingoan herri-guneraino eman nahi genuen lasterketa, horregatik, antolatzeko orduan zailtasun gehiago izan arren, herri-sarreran jarri dugu helmugako marra». Horrek, herritarrengan eragin zuzena izanen du, izan ere, 07:00etatik 14:00etara herri-gunera sartzeko modu bakarra Koilarko bidetik barna joatea izanen da eta ateratzeko Hiribere auzotik.
25.000 euro kostako zaio Urdazubiko Udalari Espainiako itzuliaren sartu-irtena. Ariztiak azaldu duenez, «urreko txandan baino puskaz gutiago» izanen da. Orduan, 150.000 euro kosta zirela gaineratu du, «baina etapa bukaera ez zenez izan espero bezalakoa, antolatzaileekin akordio honetara ailegatu gara».