Bestak bizitzeko modua
Bistakoa da, bere ustez, bestak bizitzeko moduan izaten den aldaketa. Haurra zela, «etxean pare bat egunez familiako bazkariak izaten genituen eta herrian lagunekin pilotan eta tiro-pitxonean ibiltzen nintze». Gazte garaian, berriz, besta zen nagusi: «gogoan dut arduraduna nintzelarik musika talde hoberenetako bat ekarri eta ez zuela nihorrek ostatuan lan egin nahi. Nik lan egin eta ez nuen disfrutatzerik izan». Orain berriz, plazan dantzan aritu beharrean «garagardoa eskutan, gibeletik begira» egoteko sasoia ailegatu omen zaio.
Giroan aldaketa
Aldaketa ez da beregan soilik gertatu: «giroa aunitz moteldu da eta polizia kontrolek eragin handia dute horretan. Musikan ez da aldaketa handiegirik baina lehen arratsaldetan dantza ekitaldiak izaten ziren eta horrek giroa sortzen zuen».
Parte-hartzea bultzatzeko
Bestei garai bateko txinparta emateko zerbait egitea beharrezkotzat jo du eta herritarrak dira bere ustez giltza: «herritarrak protagonista izanen diren ekitaldiak behar dira parte hartzea bultzatzeko. Frontenis edo pala txapelketak... erraterako eta dantzaldiak arratsaldetan. Horrela herritar gehiago animatuko lirateke bestara». Jatekoaren bueltan izaten diren ekitaldiek ere, arrakasta handia izaten omen dute: «ortzegun eguerdiko pintxo jatea eta gaueko paella, larunbateko zikiro jatea eta gaueko xingar jatea eta igandeko pintxo jatea Urdazubiko besten bereizgarriak dira». Eta horien artean ezin azpimarratu gabe utzi zikiro jatean biltzen den jendetza: «jende aunitz izaten da eta giro ederra sortzen da». Angelek gustukoen duen egunetako bat da zikiroarena eta horretaz gain, igande arratsaldean egiten den ekitaldia ere atsegin du: «azken urteetan Menditarrak etortzen dira».
Herriko besten ondotik, «egunerokoarekin segi eta lanera buelta», ez da bertze erremediorik. Hori bai, ahal dela aitzinetik bestarako tartetxo bat hartzera animatu ditu denak Angelek. Garai zaharrak gogoratu edo berriak gozatzera, baina denak bestara!