Arkupeak elkarteko bazkideak ortzegun goizean ailegatu dira Dantxarinera eta bentak bisitatzeko aukera izan dute. Bazkaldu aitzinetik, omenaldia eskaini diote Guateke taldeko kide zen Ramon Mitxelenari. Urtarrilaren 3an hil zen eta minutuko isilunea egin dute bazkideek, Javier Igoa taldekideak, ‘El silencio’ kantua tronpetaz jotzen zuen bitartean. Une hunkigarriak izan dira. Ondotik hasi da Otxondo jatetxeko bazkaria eta bazkalondoan, musika, dantza eta umore ona nagusituko dira.
Urtero bezala, Joxe Angel Elizalde akordeoilaria izanen da eta aurten, berrikuntza moduan, Erramun Martikorenaren ahotsa ere entzuteko aukera izanen dute. Guateke taldeak ere bere emanaldia eskainiko du. Kantuak abesteko liburuxka bat ere banatu dute parte-hartzaileen artean.