Nikolaurenean eta Karreteron eman daiteke izena eta bikote bakoitzak hamar euro ordaindu beharko ditu
Urdazubiko Gauiñara elkarteak antolatuta, mus txapelketa jokatu zuten abendu hondarrean herrian. Guztira hamalau bikotek parte hartu zuten eta herritar anitz (gazte zein guraso) ikustera joan ziren. Irabazleak Ixiar eta Aitor Rementegi anai-arrebak izan ziren; bigarrenak, berriz, Martin eta Ana Mitxelena aita-alabak. Irabazleek bina botila ardo eta azpitxapeldunek gasna bat eraman zituzten. Txapelketa horretako parte-hartzea ikusi ondotik, herritarrek urtarrilaren 26rako, heldu den larunbaterako, bertze txapelketa bat antolatu dute. 20:30ean zehaztu dute hitzordua eta elkartearen egoitzan bilduko dira.
Izen-ematea
Parte hartu nahi dutenek aitzinetik Nikolaurenean eta Karreteron eman dezakete izena eta bikote bakoitzak hamar euro ordaindu beharko ditu. Aitzineko aldian bezala, txapelketa jokatu bitartean herriko gazteak pintxoak egin eta saltzen ariko dira eta zintzurrak bustitzeko aukerarik ez da faltako.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.