Ezkorbrutak taldeak irabazi du Saran jokatu den taldekako Xilabaren saioa

Ezkorbrutak taldea eta Kosta ala kosta taldeak Saran egindako saioan.

Urriaren 12an eta 13an Gameren eta Altzumartan jokatu ziren taldekako Xilaba txapelketaren lehenbiziko saioen ondotik, urriaren 19an Saran jokatu zen hirugarrena. Ezkorbrutak eta Kosta ala kosta taldeak aritu ziren nor baino nor, eta lehenbiziko taldeak irabazi zuen; Karlos Aizpurua saratarrak eta Patxi Iriart, Gillen Hiribarren, Ekhi Erremundegi eta Mizel Mateok osatutako taldeak, hain zuzen. Giro ederra sortu zen Pleka Trinketean bildutako bertsolari eta bertsozaleen artean.

 

Eskualdeko bertsolari gehiago ere ari dira Xilaba txapelketan. Kontrabanda taldean, erraterako, Josebiñe Agirre (Zugarramurdi) eta Julene Etxeberrik (Sara) parte hartuko dute, Maddalen Arzallus eta Maindi Murua Berrarekin; eta Mattinsalto taldean Ellande Alfaro (Sara), Aitor Servier, Pantxika Solorzano eta Xumai Murua Berra ari dira. Bi taldeek heldu den asteburuan eginen dute txapelketan estreinako saioa. Urriaren 26an Pausuko Xaia ostatuan, Kontrabanda eta Mattinsalto taldeak ariko dira bertsotan. Bertso-afaria eginen dute eta afarira joan nahi duenak (0033) 547 75 07 02 telefonora deituz eman beharko du izena.

Egun berean, Ezkorbrutak taldea Urruñan ariko da, Berttoli elkartean, Ostatu batuak taldearen kontra. Hemen ere, bertso saioa eginen dute.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun