Frantziako Federaziotik atera eta Euskadiko Ligan jokatzen hasia da Sarako Izarra errugbi taldea

Ttipi-Ttapa 2018ko urr. 19a, 10:17
Sarako Izarra eta Iruñeko La Unica taldearen arteko partida, Euskadiko Ligan Sarako basurdeek jokatu duten lehena. Argazkia: La Unica RT

Iruña RC taldearen kontra jokatuko dute ligako bigarren partida larunbatean Animainean (16:00)

Sarako errugbi elkarteko helduen taldeak, Frantziako Federazioa utzi, eta Euskadiko Ligan hasia du aurtengo sasoia. Lehen partida jokatu zuten irailaren 29an Iruñeko La Unica taldearen kontra bai eta irabazi ere, 40-17. Haurren errugbi eskolak Frantziako Federazioan segitzen badu ere, helduek hautu argia egin dute Euskal Herri mailako txapelketan aritzeko. Larunbat honetan, Iruña RC errugbi taldea hartuko du Animainean (16:00).

 

Bigarren Mailan sartu da Sara, eta zazpi taldeko txapelketa bat abiatu dute urtarrila arteko lehen fasean. Multzoko lehiakideak, hauek dira: Iruñeko La Unica; Iruñeko RC; Zarautz B; Bilbo B; Logroñoko RC Rioja (Espainia) eta Igorreko Arratiko Zekorrak.

Aipatzekoa da Sarako Izarra errugbi taldeak Euskal Herriko errugbi txapelketa antolatu zuela bi urtez, eta ordutik harremanak eginak zituen Hegoaldeko taldeekin ere.

Sarako taldeko bilkura batean errugbilari gazte batek proposatu zuen Euskadiko Ligan sartzea. Orain desagertu den Euskal Kostaldea-Landak ligari baimena eskatu zioten, eta berehala baietza eman zuen. Baina, gero, bidea ez da erraza izan eta Euskadiko Errugbi Federazioaren sustapena funtsezkoa izan zaie horretarako. Euskadiko Ligara pasatzeko behar zituzten lehenik Frantziako Federazioko lizentziak geldiarazi. Egitekoak oro egin zituen Patxi Jauregi, Sarako Izarrako presidenteak: «Hainbat itzuliren ondotik, Sara bilakatu da Euskadiko Federazioko talde berri bat; ez Frantziak, ez Espainiak ez dute ezer egiten ahal», dio presidenteak. Izan ere, Euskadiko Federazioak bere txapelketa antolatzen du eta bere lizentziak banatzen ditu.

Bi jokalarik salbu, beste guziek segitzen dute Sarako Izarrarekin Euskadiko Ligann. Gehiago dena, jokalari berri batzuk sartu dira taldean Euskal Herri mailako izaeragatik. «Sei-zazpi jokalari etorri zaizkigu, bertzela ez zirenak Sarara etorriko», aipatu du Jauregik. Azkenean, hautu argia izan da parte hartzaile guzientzat: Sarako Izarra, Herriko Etxea, diru laguntzaileak. Bortz euskal lurralde dira orain Euskadiko Ligan: Gipuzkoa, Bizkaia, Araba, Nafarroa eta Lapurdi.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun