Antzinako gauzen azoka eginen dute uztailaren 21ean eta 22an Saran

Ttipi-Ttapa 2018ko uzt. 19a, 10:05
Antzinako gauzen azoka eginen dute asteburuan Saran.

Sarl Orfo-Pub elkarteak antolatutako Kukuxu Bestaren seigarren edizioa izanen da

Bertze urte batez, antigoaleko gauzen bilgune bilakatuko da herria uztailaren 21ean eta 22an, Sarl Orfo-Pub elkarteak Kukuxu Besta antolatu baitu seigarren urtez. 

 

Bi egunez, frantziar estatu osotik etorritako 150 erakusmahai baino gehiago paratuko dituzte herrian barna, plazan eta kiroldegian, eta horietan, antzinako hainbat produktu ikusi eta erosteko aukera izanen dute hurbiltzen diren bisitariek: arte bildumak, vintage produktuak, liburuak, bitxiak, arropak, alfonbrak...

Uztailaren 21ean, larunbata, 07:30ean irekiko dute azoka eta 19:00 arte karriketan egonen dira erakusmahaiak. Igandean, berriz, uztailak 22, 08:00etatik 18:00etara irekiko dute azoka.

 

Ehunka eta ehunka bisitari urtero

2013an egin zuten lehenbiziko aldiz Kukuxu Besta deitu duten antigoaleko gauzen azoka eta geroztik, aldi oroz ehunka eta ehunka bisitari bildu dira. Urtero, 10.000 lagun baino gehiago pasatzen dira azokatik.

Bertzalde, antolatzaileek jakinarazi dutenez, azokan sartzeko ez da fitsik ordaindu beharko. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun