Eguneko irabaziak Manex Erdozaintzi Etxart Kolegioarentzat izanen dira. Izan ere, Manex Erdozaintzi Etxart Kolegioko ikasle kopurua etengabe igo da eta gaur egun eraikinak sobera hertsiak dira, geroz eta ikasle gehiagoren aterbetzeko. Iaz 158 ikasle ziren, aurten 190 eta heldu den urtean 220etik goiti izanen dira.
Larzabalen kokatua den kolegioak Aloze, Sohüta, Amikuze, Oztibarre, Garazi, Azkarate, Baigorri eta Ortzaizeko lehen hezkuntzako ikastoletatik heldu diren ikasleak eskolatzen ditu Bigarren Hezkuntzan eta behar bezalako arreta eskaintzeko lau ikasgela eskas dituztela uste dute: bi kurtso gela, laborategi bat eta ahalmen urriko ikasleen segipena segurtatzen duen IEParendako (Inklusiorako Egitura Pedagogikoa) bertze gela bat.
Bezperan Urrats Gaua, Saran
Herri Urrats egun handiaren bezperan, Urrats Gaua antolatu dute Saran. Zakill, Sorotan Babies, Red Dead, Luketze eta Jompakt taldeen kontzertuak izanen dituzte kiroldegian.
