Hezkuntza Departamentuak Xaretako eskola publikoetako ikasleak batu nahi zituen. Gaur egun, Urdazubi eta Zugarramurdiko zenbait ikaslek Lapurdiko eskola eta ikastoletan ikasten badute ere, 52 ikaslek Nafarroako eskola publikoan ikasten dute eskualdean erabiltzen diren hiru hizkuntzetan (euskaraz, gaztelaniaz eta frantsesez) eta ingelesez. Lehen Hezkuntzako eskolak finitzean, Urdazubi eta Zugarramurdiko eskolakoek Lekarozko ikastetxean jarraitzen dituzte ikasketak. Nafarroako Gobernuaren proposamenak, horregatik, ez zuen muga arteko curriculum propioa sortzea helburu, mugaz bi aldeko ikasleek eskualdeko lau herrietan eta eraikin berean ikastea baizik. Haatik, Iparraldeko ikasleek frantziar curriculuma eta nafarrek beraiena mantentzea zen proposamenaren funtsa.
Herriz herri banatuak
Gobernuaren arabera, Zugarramurdiko eskolan 3 eta 4 urtekoek ikasiko lukete, 18 orduz euskaraz, lau frantsesez eta hiru gaztelaniaz. 5 eta 6 urteko ikasleak Saran ariko lirateke, 14-17 ordu euskaraz, zazpi eta hamar artean frantsesez eta lau gaztelaniaz. Ainhoako eskolara 7 eta 8 urteko ikasleak pasako lirateke, eta 9 urtekoak Urdazubirat. 10 urterekin, Lapurdiko ikasleak Iparraldeko eskolaren batera aldatuko lirateke, eta Hegoaldekoek Urdazubi eta Zugarramurdin jarraituko lukete, Lekarozera joan arte. Ordu libreetan ingelesa ikastea zen Gobernuaren asmoa.
Urdazubi eta Zugarramurdiko gurasoen iritziz, proiektua ez zaie ongi planteatu. Ezustean eta presaka aurkeztu zaiela diote, kasik pentsatzeko astirik gabe. Xaretako guraso ia guztiek seme-alabak hiru hizkuntzetan jaioak izatea interesgarria dela uste dute, baina, «esperimentu» moduan ikusi dute; galdera aunitz erantzunik gabe eta, gainera, egutegi korapilatsuak, jangelan gelditu behar izatea eta haurrak distantzia luzeetara bidaltzea. Curriculumari dagokionez, Hegoaldekoendako exijentzia maila gutitzea ekarriko zukeela adierazi digu gurasoren batek, eta gerora, ikasleek Nafarroako mailara ailegatzeko esfortzu berezia egin behar izatea ez zutela egoki irizten.
Pirinioetako Departamentutik dator proposamena. Sarako eskola publikoaren etorkizunarekin kezkaturik, Herriko Etxeko arduradunak kezkatuak baitabiltza. Sara eta Ainhoako eskola publikoetan ez da gaia ofizialki aurkeztu, Nafarroako gurasoen erabakiaren esperoan zeudelako. Hortaz, aurten Urdazubi eta Zugarramurdiko ikasleek Nafarroan ikasten jarraituko dute.