Amaia Agirrek irabazi ditu Senpereko Larraldea Bertsopaper lehiaketako hiru sari nagusiak

Partzuer eta epaile zonbait: Amaia Agirre, helduetako irabazlea ezkerretik bigarrena.

Gazte eta gaztetxoen mailan Aner Euzkitze zarauztarrak lortu du lehen saria

Lehen aldia da Senpren Larraldea bertsopaper lehiaketa elkarrekin antolatzen zutela Bertsolarien Lagunak eta Lapurdi 1609 elkarteek, bainan jasotako arrakasta ikusirik, ez dateke azkena. Odei Barroso, Panpi Etxegoin, Lierni Elortza eta Jokin Arregi epaileek dioten bezala, «guztira 51 lan aurkeztu dira lehiaketarat; horietatik 20 helduen mailan, eta 31 gazte eta gaztetxoen mailan. Maila eta kalitate handiko sortak aurkeztu dira Larraldea sariaren lehen edizioan. Landutako gaien aniztasuna eta aberastasuna ere azpimarratzekoa da, hala nola sortetan aurki daitezkeen euskalki eta hizkuntza erabilera forma ezberdinak». 

 

Bertsolarien Lagunak elkarteko Xumai Murua izan da xedearen sortzailea, eta harrituta egon da Eskual herriko xoko guzietarik jendeek parte hartu dutelakoz, eta adin guzietakoak gainera. Hala nola, Angelutik, Gotainetik, Zarautzetik edo Bermeotik igorri dauzkute beren ekarpenak. «Gazteetan, pertsu egile gehienek bertsolaritzan hartzen dute ikastoletan, helduen artean aldiz ez. Ohartu naiz bertsolaritza aski hedatua zen eta oraino aski herrikoia».

Helduen mailan, hiru lehenbiziko sariak Villabonako Amaia Agirrek eskuratu ditu, Eutanasiari bai, Gure ADN eta Amari bertso-xortekin. Sari berezia Urruñako Xumai Muruak eskuratu du, Senpereko buruxkak bertso-xortarekin.

Gazte eta gaztetxoen mailan, lehen saria Aner Euzkitze zarauztarrak eskuratu du, Jolastu nahi dut baina…  bertso-xortarekin, bigarrena Izurako Elixabet Etxandi Goienetxek, Errutinaren bezero lanarekin eta hirugarrena Hazparneko Irantzu Idoate Funosas-ek, Lorentxari gutuna lanarekin.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun