erran.eus

Bizkaiak irabazi du Zazpi Herrialdeetako herri kirol Txapelketa Saran

  Kirola  Xareta  Sara

Nafarroa Garaia txapeldun orde izan da, nahiz eta Lesakako Beti Gaztek garaipena lortu sokatiran

Bizkaiak irabazi zuen larunbat arratsaldean Sarako kiroldegian jokatu zen Zazpi Herrialdeetako txapelketa. Espero bezala, aurten ere Zuberoak ez du txapelketan parte hartu eta hortaz, sei herrialde lehiatu dira. Nafarroa Garaia azpitxapeldun izan da.

Bizkaiak irabazi du Zazpi Herrialdeetako herri kirol Txapelketa Saran
Lesakako Beti Gaztek garaipena lortu zuen sokatiran, baina ez zen aski izan txapela Nafarroara ekartzeko. | Ikusi handiago | Argazki originala

 

Azken urteotan lehia estua izan da Bizkaia, Nafarroa eta Gipuzkoaren artean eta bizpahiru punturen barrenean sailkatu dia. Aurten, ordea, lau puntuko aldea atera dio Bizkaiak Nafarroari eta zortzikoa Gipuzkoari. Laugarren posturako borrokan Lapurdi nagusitu zaio Arabari, nahiz eta arabarrek bi probatan garaipena lortu zuten. Nafarroa Beherea seigarren izan zen.

Nafarroak bi garaipen lortu zituen, zaku lasterketan eta sokatiran, Lesakako Beti Gaztek egindako lanari esker. Arpanan, ordea, bigarren izan ziren faborito ziren Barberena anaiak eta aizkoran ere, bigarren izan zen Iker Vicente, Aitzol Atutxa bizkaitarraren ondotik.

Bizkaiak, arpanan eta aizkoran ez ezik, koxkor biltzen eta orga jokoan ere garaipena lortu zuen.

Erran bezala, Arabak bi garaipen lortu zituen, ingude altxatzen eta txingetan.

Gipuzkoak lasto altxatzen lortu zuen irabaztea.

Gauzak honeka, Bizkaiak irabazi zuen Zazpi Herrialdeetako txapelketa, 47 punturekin; Nafarroa Garaiak 43 eskuratu zituen, Gipuzkoak 39 puntu, Lapurdik 33 puntu, Arabak 31 puntu eta Nafarroa Behereak 15 puntu.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa