Kattalin Indaburu, Thierry Biscari Kalakan taldekoa, Xenderineko ahizpak, Martxel Brave eta Jean Noel Bessonart herritarrek ere parte hartuko dute kantu bazkarian. Bixente, Piarres, Txeutx eta zonbat herritar gaztek gaitzeko lana daramate egun hauetan egun hori behar den bezala muntatzeko. Izenak eman (30 euro) lehenbailehen Piarres deituz 0033 (6)83829834.
12:00etan zintzur bustitzea izanen da eta 14:00etan bazkaria, kantu bilduma liburuxka eskainia izanen zaielarik parte hartzaile guziei
Senpereko Kantu Egunaz
…Kantuz ari gabe gu deusik ez gare! Larreko bertsulari zenaren hitzak orratza bezain zuzenak ziren eta Ixtilarteko nagusiak ongi asmatu zuen bertsua “Senperen kantuz” ereserkia indartzeko. Senperen kantuzaletasuna haundia bada aspalditik, bestetan, gazteen artean edo mota guzietako ekitaldietan, elizkizunetan barne. Dena den gure perlak galtzen zirelakoan kantu xaharren bazkariak apailatzen hasi ziren duela kasik hogoi urte. Mixel Mendiburu, Auxtin Zamora, Oxtikenekoak eta Hatsa elkarteko lagunek baitezpadakoa ikusi zuten herritarrak elkarretaratzea kantuaren egunaren karietarat eta gisa huntan munta haundiko hamar bat biltzar egin dituzte. Egun horietan bildu kantuekin, zenbait liburu eta diska atera izan dituzte ondarea denen esku uzteko eta gisa hortan betikoz ditugu Apextei, Laurent Elorga edo Fifin Billon edo Auger Ibarrak alegeraki ematen zituzten kantuak.
Urteak joan urteak etorri kantu xaharren bazkariak itxuraz aldatu dira gomita gehienak zendu baitira eta tokia gazteeri ematea pentsatu dute herriko kantuzaleek.