Martxoaren 28an, XXXIII. Euskal idazleen biltzarra eginen da kiroldegian. Itxaro Borda idazlea eta Michel Iturria margolaria omenduko dituzte. Aurten lan berezi bat eramana izan da lehen mailako eta kolegioko ikasleekin, transmisioa gaiari buruz, eta proiektu horren bururapena aurkeztuko dute. Haurrentzat animazioak ere antolatuak dira. Sartzeak 2 euro balio du.
Berrikuntzak
Berrikuntzekin iraganen da aurtengo Sarako Idazleen Biltzarra. Orain arte, Sarako Turismo Bulegoak kudeatu izan du literaturaren hitzordu hau, baina aldi honetan, Sarako Biltzarra izenarekin sortu duten elkarteak bere gain hartu du antolaketa. Bi helburu nagusi finkatu dituzte: gazte gehiagoren erakartzea eta euskarari toki handiagoaren eskaintzea. Hala, ikastola, eskola publiko, eskola katoliko, kolegio eta lizeotako 200 ikaslek baino gehiagok parte hartu dute.
Horrez gain, biltzarrari eskainitako lekua bikoiztu egin dute eta lau gune prestatu dituzte: erakusketa artistikoen txokoa, liburu berriak dohainik kontsultatzekoa, haurren txokoa (animazioak, ikusgarriak, tailerrak, irakurketak, ipuinak... izanen dira) eta mintzaldi eta hedabideei eskainitakoa.
Gainerakoan, 11 argitaletxe, 22 elkarte eta ehun idazlek baino gehiagok parte hartuko dute Sarako Biltzarrean.
