Herriko ondare kulturala eta ingurumenaren garrantzia azpimarratu nahi du SOS Alkerdik jardunaldi hauetan. Babestuak eta katalogatuak dauden Berroberria eta Alkerdiko leizeak batetik, eta zonaldeko Zelaieta I eta III leizeak bestetik.
Igandeko 09:30ean emanen zaio hasiera egunari Urdazubiko plazatik. Kobak bisitatzeko 6 kilometro inguruko bisita antolatu da eta bi orduko iraupena izanen duela aurreikusten da.
Ondoren, 12:30ean, Ignacio Barandiaran EHUko Historiaurreko katedradunak hitzaldia emanen du koba hauen inguruan. Hitzaldia Kultur Etxeko areto nagusian izanen da (garai bateko aroztegian).
Bisita eta hitzaldiaz gain, egun osoan zehar Salbatore Monasterioko museo eta arte erakusketara dohainik sartzeko aukera eskainiko da.