Burdinaren eguna ospatuko dute abuztuaren 8an Urdazubin

Bizkaiako Pobeña herritik abiatuko da autobusa, 07:30ean. La Cendejan 07:40etan, Las Carrerasen 07:50etan eta Gallartan 08:00etan gelditu ondotik, 10:00etan ailegatuko dira Urdazubira.

10:00etan Dantxarineako Bentetan ibiliko dira, ordubetez. 11:00etan harrera eginen zaie Urdazubiko plazan. Segidan, herrian barna ibili ondotik, herritar eta gonbidatu batzuen eskutik, antzina egiten zen burdin mineralaren gurdiaren etorrera aurkeztuko dute, antzerki moduan. Hitzaldi bat entzuteko eta bertako produktuak erosteko aukera ere izanen dute herritar eta bisitariek. 15:00etan zikiro jatea izanen da; eta bazkalondoa alaitzeko Bankako kantariak izanen dituzte.  

Zikiroko sarrerak herriko ostatuetan, Montxo, Karretero eta Anastasin ostatuetan, daude salgai, 30 eurotan.