2015ko Fabaren errege-erreginaren aukeraketa egin zuten abenduaren 13an Urdazubiko Gauiñara elkartean. 10 urtetik 12 urte bitarteko herriko hamar-neska-mutikoen artean egin zuten aukeraketa eta Axulargaineko Jokin Etxart-i suertatu zitzaion urtarrilaren 10eko ekitaldian errege eginen duen baba.
Axulargainekoarekin batera, Aritzaldeko Lorena Arozarena, Azkainttikiko Aitor Elizalde, Donpedroneko Janire Agerre, Erramuondoko Zuhaitz Bazterrika, Nikolaureneko Leire Gomez, Oihanondoko Oihana Parisis, Olaberriko Maialen Jaurena, eta Txarrantxetako Enara Ariztia eta Laida Ariztia izan ziren hautagaiak, baina ez zuten halako suerterik izan.
Abenduaren 13ko ekitaldia alkatearen ongietorriarekin eta Muthiko Alaiak elkarteko kide baten agurrarekin hasi zen. Segidan Armen Errege papera egiten duen Fernando Hualdek besta honen eta hautaketaren unearen esanahia azaldu zituen. Festaren irudiak ikusi zituzten bideo batean eta erroskoa zatitu zuten. Jokin Etxart-i suertatu zitzaion erregearen baba. Herriko bizilagun eta umeak ospakizunaren pausu guztiak ezagutu ditzaten dokumentazioa eta komiki bat ere banatu zuten beraien artean.
Mende erdia da Iruñeko Muthiko Alaiak elkarteak Nafarroako erregeen tradizioko Fabako errege ibiltari festa ospatzen duela Nafarroako herrietan eta urtarrilaren 10ean Urdazubik hartuko du festa hau.
URTARRILAREN 10EKO EGITARAUA
Larunbateko Faba Erregearen besta eguerdian irakurriko den pregoiarekin eta dantzarien eta joaldunen saioekin hasiko da. 18:30ean desfilea eginen dute eta 19:00etan koroatze zeremonia.