Manuel Bengotxea eta bere familiak ustiatzen duten gasnategiak World Cheese Awards Munduko lehiaketan parte hartu du aurten ere. 2012an ez bezala, oraingoan etxean ekoizten dituzten bi ardi gasnak aurkeztu dituzte, eta biak ala biak Munduko 50 gasna onenen artean kokatu ditu epaimahaiak.
Lehiaketan 33 estatuko 2.600 gazta lehiatu dira, 250 dastatzaileren epaiaren esperoan, eta Bengotxeak jaso duen Super urrezko domina, banatu diren 28 sarietako bat da. Bengotxea izenarekin komertzializatzen den Idiazabalgo Jatorrizko Izendapeneko gasnak, zazpigarren postua lortu du. Bertzea, Etxelekua izenarekin saltzen da, baina ez du Bengotxea izenarekin saltzen denaren prozesu zorrotza jarraitzen.