Urriko udal batzarrean tentsio uneak bizitu ziren Azkar taldeko Santiago Villares alkatearen eta Urtxume taldeko bozeramailea den Andres Diharasarriren artean, gai ezberdinak tratatzerakoan. Bertzeak bertze, urriaren 31ko bilkuran Aroztegi zaharrean Herriko Etxeak egin nahi dituen obren berri eman zuen alkateak. Aroztegiari solairu bat gehituko omen zaio. Proiektuan aurreikusten diren espazioak turismo bulegoa, denda eta balioanitzeko gela dira, baina Azkar taldeko Juan Jose Suhas zinegotziak bertan haurtzaindegi bat jartzea proposatu zuen. Urtxumeko bozeramaileak eraikinaren jatorrizko egitura errespetatu, txukundu eta konpontzea eskatu zuen.
Andres Diharasarriren ustez, ez du zentzurik urtero Burniaren Eguna ospatzeak eta gero berezko burniolaren aztarnak ez babesteak. Urtxumekoen iritziz, bertan burnigintzarekin loturiko lanbideen interpretazio zentro bat sortzea proiektu interesgarria izan daiteke.
Aroztegiaren atzeko belaian zer egiteko asmoa zegoen ere galdetu zuen oposizioak. Alkateak bertan martxan jarri den «animaleria, gauza polita dela uste dut» erantzun zuen, nahiz eta bigarren urtez udan publikoari itxita egon den espazio hori. Alkatearen hitzetan, oraingoan bai, baimen guztiak omen dituzte lanean aritzeko.
Aroztegian eginen diren obren proiektuaren esleipena zuzenean eginen da. Udalak hiru enpresari eskatuko die beren proposamenak aurkeztu ditzaten. Kostua 365.000 eurokoa izango dela aurreikusi dute udal arkitektuek, azken urteotan herrian egin den obra publiko garrantzitsuena. Azkar taldeko lau zinegotziek baiezkoa eman zioten proiektuari eta Urtxumeko biak abstenitu.
BERTZE ERABAKIAK
Guraso elkarteak urtero eskatu ohi duen 500 euroko diru laguntzari baiezkoa eman zitzaion. Udal eraikinak, errota, klaustroa, aterpetxea eta museoa desinfektatuko dira. Zubiondoko merendero azpitik doan saneamendu tutua moldatuko dute, eta Montxotik Koxkara doan errekan konponketak egitea onartu zen. Herrian EITB hartzeko mozioa onartu zen. Ur horniketa modernizatzeko deposito berriak milloi bat eurotik gorako kostua izanen du eta Europako diru laguntzak bilatzen saiatuko da Udala, Nafarroako Gobernuaren babesarekin.