Pintxoaren Lehen Hamabostaldia eginen dute Dantxarinean urriaren 25etik azaroaren 7ra eta horren aurkezpena egin zuen urriaren 21ean Txomin Iribarren, Dantxarinea elkarteko presidenteak.
Hamabortz egunez Dantxarineako Bentako jatetxeek okasio honetarako eginen diren pintxoak eskainiko dituzte.
Mugaren bi aldeetako sukaldari ospetsuak izanen dira epamahai eta pintxo hoberena izendatuko dutenak. Baina adituetaz gain, jendeak ere parte hartu ahal izanen du bozketan. Horretarako, Urdax-Urdazubiko Facebook orrialdean azalpen bat uztea nahikoa da edo bentetan egonen diren boletoa betetzea. Dantxarineko pintxo hoberenaren aukeraketan parte hartzen dutenen artean zozketa eginen da eta irabazleak Mutrikuko Haitzalde Landa-Turismoan asteburua pasatzeko aukera izanen du.