Azkar eta Urtxume udal-taldeetako kideekin batera, abuztuaren 29ko udal batzarrean SOS Alkerdiko hainbat kide hurbildu ziren Herriko Etxera. Castor Iribarren S.A. enpresak Dantxarinean duen Joseneako lantegia zabaltzeko proiektuari buruz udal arkitektuek emandako iritzi baikorra aipatu zuen alkateak. Gobernu taldeak arkitektuen txostena kontuan hartuz, baiezkoa eman zion proiektuari.
Aurrekontuei dagokienez, Nafarroako Administrazioaren Auzitegiaren 14.236 ebazpena tratatu zen. Labaien anai-arrebek 2014ko aurrekontuen aurkako errekurtsoari eman beharreko erantzuna onartu zuen Gobernu taldeak eta bertzetik, 2013ko udal aurrekontuak eta Urdazubiko Elektraren kontuak ere onartu zituen.
Aurten egiteko hainbat obra onartu ziren. Diru-laguntzak eskatu dira, baina esperoan gelditu beharrean, finantza-plan bat garatuko da proiektu bakoitzarendako, horretarako Udalak kostuaren %100 bere kontu hartuz. Alde batetik, Larrainta, Koilar eta Landibar behereko errepideak argiztatzeko proiektuaren finantzazio plana onartu zuten Azkar eta Urtxumeko zinegotziek. Herriko bi bide konpontzeko proiektua martxan jartzeko finantzazio planari ere baiezkoa eman zioten. Iribehereko saneamendu lanekin ere berehala hasiko dira, proiektuak zinegotzi guztien baiezkoa jaso ondotik.