Denetatik izan genuen bestetan: eguraldi txarra Andremari egunean, non dantzarien emanaldia desitxuratu zen (eta dantzariak tzipatu, noski). Zikiro eguneko ilunabarrean ere zirimiri zikin bat egin zuen, baina ez zuen giroa batere hondatu. Zerbait ezkorra izanda, aipatzekoa da herri-afariak indarra galdu duela, mozorro gauak bezala, arras jende gutti animatu baitzen.
Bertzalde, dantzarien aldetik bi nobedade izan ziren, Meza Nagusian dantza bat eskaini zutela, eta bertze bat bi pilota partiden artean. Jiganteak ere aurten pulit-pulit atera ziren, soineko berriak estreinatu baitzituzten Enkarna eta Gurutxeri esker. Pilota finaleko irabazleak Klemen eta Olibie izan ziren, eta azpitxapeldunak Manu eta Noel. Eta finitzeko, aipatu herriko punk taldeak plazan debutatu zuela, Joselu Anaiak taldearen telonero bezala. Gaueko dantza emanaldiaren deskantsuan aritu ziren.
Besta eta refetak pasatu dira, baina oraindik bada lezean eskainiko den bertze ikuskizun bat: Sorgin haizeak antzerkia, Berako abesbatzakin batera, eta berezitasun bezala, zikiro erretze erakusketa eta dastaketa ere izanen dira. Irailaren 20an eginen da. Datu gehiago hurrengo alean.