Herriko jatetxe zaharrenetariko batek nagusi berria du. Dolarean eta Laxoinean tarteka jatera ematen zen arren, duela 29 urtera arte jatetxe bakarra ginuen herrian, Herriko Etxea. 1985ean Juan Luis Alkortak Txarli Altzatenea etxean izigarri moldaketa pulitak egin ondotik, izen bereko jatetxea edeki zuen.
Txarlik bertze berezitasun bat eman zion jatetxeari. Getaria, Orio, eta beste hainbat kostako herritan bezalaxe arraina eta haragia, jatetxeko atean, parrillan jendearen aitzinean, erretzen baitzuen.
Egun batez Frantziako “Geo” aldizkariko kazetari batek han bazkaldu zuen, arras gustura gelditu zen, eta erreportaje eder bat argitaratu zuen aldizkarian. Horrek ospe haundia eman zion, eta Frantzia aldetik jendea espres etortzen zen Altzatenean bazkaltzera.
Orain Txarli bere bizitzako etapa bat itxitzera behartu da, baina ez ordea jatetxea itxitzera, Altzatenea esku onean utzi baitu: Oieriko-bordako Amaia Etxeberriak hartu du.
Behar ziren aldaketak egiteko bi aste etsita egon ondotik, uztailaren 4an irekiera besta ttiki bat egin zen. Martxan dugu berriz Altzatenea jatetxea bere txoko xarmangarri eta janari goxoarekin.