Usaia den bezala ospatu dute aurten ere San Isidro eguna gure nekazariek: Alkerdiko kaperan meza egin zuten, eta lur-eremuak bedeinkatu zituen apezak. Ondotik ospakizun “zibila” etorri zen: kaperako atean berean aperitifa ttiki bat hartu zuten, eta hortik Armua jatetxera joan ziren bertan bazkaltzeko. Bi herrietako nekazariak elkartu ziren, eta bazkarian 25 lagun ziren denetara. Nahiz eta gehienak jubilatuak izan, aipatzekoa da gazte batzuk ere bazeudela.
Gaur egun San Isidro da egiten den ospakizun bakarra, baina gure xaharrak oraindik oroitzen dire denbora batean, maiatzean ,egiten ziren ospakizunetaz: hilaren 1ean hiru gurutzetara gaten ziren: lehenbiziko Ainarako gurutzera, handik Gandeseneko kaskorat, eta Bixkarrekoan finitzen zuten. Gero, maiatzaren 3an Martineko gurutzerat gaten ziren. Eta azkenik, San Isidro egunean, Mendibilekora (gaur egun hemen ez dago gurutzerik, zimizta batek hautsi zuelako).