Udalak ez ohiko batzarra egin zuen apirilaren 9an. Nafarroako Administrazio Auzitegiak atzera bota dituen hainbat erabaki direla eta, Udalak errekurtsoak jartzea erabaki du.
Santiago Villares alkateak jakinarazi zuenez, Udala behartuta dago gehiengoa osatzen duen Azkar taldearen babesarekin onarturiko erabakien defentsan epaitegietara jotzera. Oposizioko Urtxumekoen iritziz, udal erabaki okerrei esker onurak eskuratu dituzten pertsonei dagokie errekurtsoa jartzea, herriaren diruak xahutu gabe.
Urtxumek Nafarroako Administrazio Auzitegian Udal Gobernuaren erabaki baten kontra irabazi duen helegitearen berri galdetu zuen. Auzitegiaren arabera, herriko argindarraren komerzializazioari buruzko txostena egin zuen enpresak ez zuen lan egokia egin eta, hortaz, Udalari 145.000 euro itzuli beharko dizkio. Alkateak dokumentua aztertu ondoren erantzunen du.
Dantxarineako bentetan tabakoa erostera etortzen diren frantziarrek etxeko bidean pairatzen duten jazarpena dela eta, Alkateak Schengen-eko tratatua betetzen ez dela eta, PP-ko eurodiputatu batekin bildu zela aipatu zuen.
GARBITZAILE BERRIA
Kaleak garbi mantentzeko langilea kontratatu du Udalak. Hainbat herritar kexu ziren zakarrontziak zaborrez gainezka ikusita. Hautaketa prozesuaren ondorioz, herriko gazte bat da garbitzaile berria.