Burdinaren Egunaren seigarren edizioa agorrilaren 10ean, larunbatean ospatuko da Urdazubin. Horretarako egitarau zabala prestatu dute. Bertizko Partzuergoko Izaskun Goñik eta Santiago Villares Urdazubiko alkateek aurkezpenean adierazi zutenez, «sendotzen ari den besta da Burdinaren Eguna, bisitari aunitz erakartzen dituena».
Burdinaren Eguneko egitaraua goizeko 10:00etan hasiko da, artisautza azoka irekiko baita. 35 eskulangileren lanak espero dituzte plazan. Brun anaien eskutik, burdin langileen erakustaldia eginen da eta haurrendako puzgarriak eta ureko jokoak ere paratuko dituzte. 12:00etan burdin mineralez zamatuta datozen idiak helduko dira monastegi ingurura. Ordu erdi lehenago, Axularretik abiatuko dira. 12:15ean burdina urrezko txanponengatik trukatzeko ekitaldia eginen da, hain zuzen Urdazubiko monastegiko abadeak Plentziako benakeroei egiten ziena. Ondotik Iruñeko Orfeoiko ahots lodien abesbatzak kantatuko du plazan. 13:00etan, berriz, “Premostratenseak euskal lurraldean” ikusentzunekoa eta solasaldia eskainiko du Michel Duvert-ek elizan. 14:30ean zikiro jatea izanen da, Iruñeko Orfeoiko ahots lodien abesbatzak alaitua. Bazkal ondoan DJ batek musika paratuko du.
Horretaz gain, egun osoan animazioa, musika eta monastegia, errota eta lezeak bisitatzeko aukera izanen da.