Hainbat hilabetetan berritze lanetan aritu ondotik, udaberritik hunat izigarri itxura ederra hartu du elizak.
Eta sari bat balitz bezala, hiru astez ETBk mezak grabatu ditu eliza huntan: ekainaren 8, 15 eta 22ko larunbatetan grabaketak egin, eta biharamuneko igandeetan eman ditu. Meza ederrak izan dira, lehenbizikoan haurrek izan zuten parte hartze garrantzitsua, eta bertzeetan bi herrietako kantariek bere kantu politenak eskaini zituzten.
Eliza hau aspaldikoa da, uste baita duela 1.100 urte dagoeneko egina zegoela. Baina eliza izateaz gain, fraileen bizileku ere izan da, urte aunitzetan gainera Nafarroako monasterioen artean garrantzitsuenetakoa. Bere historia luzean garai beltzak ere bizi izan zituen: Nafarroako konkistaren ondorioz 1526. urtean erre zuten. Gero 1793. urtean frantses soldaduak sartu eta berriz ere erre zuten (9.000 liburu omen zituen orduan, eta denak erre ziren). Azkenik 1839 urtean gobernuak saldu zituen monasterioko ondasun guztiak, eliza izan ezik. Geroztik herriko eliza bihurtu zen.
AZKEN BERRIKUNTZAK
Eliza barreneko azken berrikuntzak gan den urteko uztailean hasi ziren eta urriaz geroztik itxia egon zen. 240.000 euroko aurrekontuarekin, koadroak eta irudiak zaharberritu ziren, baita elizaren erretaulak ere, bi gehituz. Zorua berritu, berogailu sistema aldatu, aldare berria egin eta ganga eta hormak margotu ziren hasieratik zutabeak zuten motibo geometrikoak berreskuratuz. Aurten, apirilaren 20an egin zuten berrikuntzen inaugurazioa.