350 kantuzale elkartu ziren azaroaren 24an Dantxarinean Kantu zaharren eguna ospatzeko. 2004an ospatu zen lehenengoz egun hau eta aurten, bederatzigarren edizioan, egun honen arrakasta erabatekoa dela agerian gelditu da da. Horren adierazle da, azaroaren 3an goizean sarrerak salgai jarri eta eguerdirako guztiak agortuta zeudela.
Eguerdiko ordubietan hasi zen bazkaria Lugarana jatetxean eta bazkal ondoren hasi zen gozamena, euskal kantugintzari errepaso ederra eman zioten. Iturengo arotza abestiarekin hasi eta Lepoan hartu ta segi aurrerarekin segitu... Zortzi orduz aritu ziren kantuan, eta eztarriek ez zuten atsedenik hartu nahi. Abeslariez gain, tartean izan ziren, Zubietako Joaldunak, Leitzako dantzariak, Jalisko Ibarra eta bere tronpeta giro, paregabea sortuz.
Aurten berrikuntzak ere izan ziren eta Euskadi Irratiari, Mikel Laboaren sendiari eta Carmen Deskarga, Angel Mariezkurrena kantu zaharren egunaren antolatzailearen amari, omenaldi ttiki bana egin zieten. Gainera, Mahai Inguruko kantuak taldearen bigarren diska ere aurkeztu zuten. Aipatzekoa da diska berria 10 eurotan salgai dagoela eta salmenta bakoitzeko euro bat Bortziriak, Malerreka eta Baztango gizarte zerbitzuetara bideratuko da, beharrean dagoen jendeari emateko.
Ohiturari eutsiz, Agur Jaunak abestiarekin eman zioten akabaila biribila egunari eta datorren urteko Kantu zaharren egunaren esperoan dira dagoeneko kantuzaleak.