Euskal kantak abestea maite dutenek urteko hitzordua Dantxarineako Peio Bentan egin baitute aurten ere, Lugarana jatetxean. Azaroaren 24an eginen da Kantu Zaharren Egunaren bederatzigarren edizioa, sortzez eratsundarra baina Sunbillan bizi den Angel Mariezkurrenaren ekimenez.
Egun osoko egitaraua antolatu du: 14:00etan bazkaria eginen da, eta bazkalondoan kantuan ariko dira. 20:00etan, berriz, berendu-afaria eginen da eta ondotik kantuan segituko dute 22:30 aldera bitarte.
Urtetik urtera izaten dira sorpresak jaialdi honetan, eta aurten ere hala izanen dela azaldu digu eratsundarrak. Ipar zein Hego Euskal Herriko kantariak hurbiltzekoak dira, baina ezustekoa zein izanen den ez du argitu: «sorpresak izanen dira baina egun berean jakinen da zer diren».
Dagoeneko agortuak dira bazkarirako txartelak. Mariezkurrenak 350 txartel paratu zituen salgai 55 eurotan, baina egun batean denak saldu zirela adierazi dio TTIPI-TTAPAri. Horren harira, «alde batetik, oso kontent» dagoela aipatu digu, baina bertzetik, «pena» ere ematen omen dio, jendea aukerarik gabe gelditu delakoz. Joan den urtean bezala, 155 euskal abestiekin osatutako 2.500 liburuxka prestatu ditu eta guztiak banatzeko asmoa du. Horietatik 500 inguru azaroaren 24an bazkarira agertzen direnek jasoko dute, bere tokian. Gainerakoak 5 eurotan salgai jarriko dituzte eta Kantu Zaharren Eguna ez ezik, aurten Nafarroa Oinez antolatu duen San Fermin ikastolari laguntzeko izanen da.
MAHAI INGURUKO KANTUAK II
Mahai Inguruko kantuak II diska ere plazaratu dute, 12 abestirekin. Alberto Zunzarren, Antonio Inda, Itziar Aleman, Goreti Antzizar, Jokin Irigoien, Juan Mari Aleman, Kiko Gartxitorena, Lorea Babaze, Luis Mari Retegi, Maxux Elizegi, Patxi Mariezkurrena eta Angel Mariezkurrena ari dira kantari. Musikariak, berriz, Aitor Ibarra Jalisko (tronpeta eta musika ekoizlea), Beatriz Agirre (akordeoia), Joxerra Mitxelena (baxua eta gitarra) eta Jon Irazoki (pianoa). Elbeteko estudioan grabatu dute, Mikel Biguria eta Candi Fernandez teknikariekin. 10 eurotan paratu dute salgai, baina diska bakoitzeko euro bat, krisiaren eraginez Bortziriak, Malerreka eta Baztanen beharrean daudenei bideratuko zaie.