Txuletaren Egunaren aitzakian, egun osoko besta antolatu dute larunbaterako Urdazubin. Ekimena ortzegun goizean aurkeztu zuten Santiago Villares Urdazubiko alkateak, Bertizko Partzuergoko dinamizatzailea eta gerentea den Izaskun Goñik eta Mundo Delicia Seleccion-eko arduraduna den Jose Mari Caminok.
Txuleta izanen da eguneko protagonista, baina ez bakarra. Goizean parrilleroak txuleta nola prestatzen duten ikusteko aukera izanen da eta horrez gain, 11:30ean euskal dantzak ikusgai izanen dira eta 12:30ean herri kirol saioa eskainiko dute Larretxea anaiek.
14:30ean herri bazkaria izanen da frontoian eta gazteeentzat menu berezia eskainiko da. Bazkalondoan, 16:00 aldera, musika izanen da eta 17:30ean pilota erakustaldia, Pilotaren Unibertsoa ekimenaren barne. Paxaka, larruzko paleta eta zesta punta izanen dira landuko diren modalitateak. Bertzalde, egun osoan monasterioa, errota eta leizeak ikusteko aukera izanen da.