Sorginen historia, euskal mitologia, antzinako bizimodu eta ohiturak, eta sendabelarren erabilerak Sorginen Museoan ageri diren zenbait gai dira, baina haur ttikienek ulertu ezin dituztenez, bortz tailer diferentak prestatu dituzte beraientzat.
Lesakako Irain Eskola Publikoko 30 ikasle izan ziren lehendabizikoak esperientzia berri hau probatzen. Herriko karriketatik, Sorginen Museotik eta Lezetik Sorgina salbatuko dugu! ginkana egin zuten: sorgin batek Barrenetxeko Graxianaren arima salbatzeko frogak azaldu zizkien, adibidez, telefono puskatuaren froga, haiek ere konprobatzeko informazioa aldatzen dela pertsona batetik bertze batera pasatzen denean. Horrela ez da harritzekoa sorginei buruz hainbertze gaizki ulertze eta gezur sortzea eta auzokideen artean salatzea. Eguzkilore bat margotzea edo lezean edabe magiko bat prestatzeko osagaiak lortzea izan ziren haur lesakarrendako antolatutako bertze jokoak.
Ondotik Berako Ricardo Baroja eskolako ikasle ttikienak izan ziren euskal mitologiari buruzko tailer berria ezagutu zutenak. Bi sorginez lagunduta, euskal mitologiako pertsonaia nagusiak identifikatu zituzten, euren ontasuna edo gaiztotasuna baloratu, eta finitzeko konjuro gisa joko bat egin zuten lezean, izaki hauen mesedea erakartzeko.
Horietaz gain, bertze tailer hauek ere prest daude edozein eskoletako haurrek gozatzeko: gomaevarekin prestatutako panpinen bitartez Zugarramurdiko sorginen historia landu; «fama txarra» duten animaliei buruz hausnarketa (apoa edo saguzaharraren fama txarra, adibidez); elikadura osasuntsua, garaikoa eta sendagai naturalaren balioa ezagutu.
Zonaldeko eskolek tailerren bat egin nahi baldin badute, informazioa jasotzen ahal dute 948 599004 telefonoan edo info@zugarramurdi.es helbidean.