Urdazubiko Salbatore besten barne, maiatzaren 19an eginen Kontrabadisten Lasterketa. Ibilbidea eta sariak aitzineko urtekoen berdinak izanen dira.
Lasterketa 10:00etan abiatuko da plazatik eta helmuga ere toki berean izanen du. Tartean, Elizondoko bordatik pasako dira lasterkariak eta hemendik Azkarko lepora igoko dira (410 metro) eta Argaingoita mendiaren gibeletik Axular etxera jautsiko dira. Iribere auzoari itzulia emanez, tarteko helmugara ailegatuko dira, Irigoienena aterpean dagoena, 7,8. kilometroan (100 metro). Fraileen iturritik pasatakoan, Elorgako bordaraino (390 metro) igoko dira Otsondottiki mendiari itzulia emanez eta ondoti, plazara (98 metro) jautsiko dira berriz, Gainekola bordan barna. 15,8 kilometroko ibilbidea izanen da eta desnibel maximoa 326 metrokoa.
Izen-ematea
Izen-ematea www.kirolprobak.com web orrian egin beharko da, maiatzaren 16a baino lehen, eta hamar euro ordainduta. Lasterketako egunean ez da izen-ematerik onartuko eta gehienez 200 lasterkari onartuko dira.
Sariak
Lehendabiziko sailkatuak 500 euro, txapela eta kopa hartuko ditu (Montxo Ostatua Saria), bigarren sailkatuak 250 euro eta kopa, hirugarrenak 150 euro eta kopa, laugarrenak 100 euro, bosgarrenak 50 euro eta tarteko helmugara ailegatzen den lehendabizikoak Irigoienea Saria hartuko du, asteburu bateko egonaldia, hain zuzen. Horrez gain, herriko hiru lehendabizikoendako ere sariak izanen dira. Parte hartzaileen artean, opariak banatuko dira eta luntxa ere izanen da denendako.