Motorrarekiko duen zaletasuna attarengandik datorkio Julen Huarteri (Urdazubi, 1981). Eta afizio horrek Libiako basamortura eraman du berriki bertze 19 lagunekin batera. Libian gatazkak bete-betean dauden honetan, Murzuq desertua zeharkatu dute motorrean, baina Libiako liskarren inolako berririk izan gabe. Egoeraz jabetu orduko hartu zuten etxerako bidea, baina «esperientzia positiboa» izan dela kontatu digu, nahiz eta bitarte horretan, hemen sortu den korapiloak «pena» ematen dion.
LEHENBIZIKO PROTESTAK
«Mikrobusean kanpinera gindoazela, Gaddafiren aldeko gazte batzuk aurkitu genituen oihuka. Lehenbizian ez ziguten utzi pasatzen eta sustoa hartu genuen. Baina gero utzi ziguten».
BELDURRA
«Beldurrik haundiena etxetik egoera larria zela erran zigutenean eta biharamunean ezin komunikatuz genbiltzala ikusitakoan sentitu nuen»
Ttikitatik du afizio motorra Julen Huartek, eta bortz urte baino ez zituela, attak motorra oparitu zion. Halere, 16 urterekin heldu zion gogoz motorrari. 18-19 urterekin txapelketetan parte hartzen hasi zen, eta dagoeneko hainbat sari baditu irabaziak: Nafarroako txapelketa, Espainiakoa cross country modalitatean... Baina berriki egin duen espedizioa izan da urdazubiarra hedabideetan gehiago agertzearen arrazoia. Izan ere, Libiako liskarren berririk izan gabe, Huartek eta bertze 19 lagunek Libiako Murzuq basamortua zeharkatu dute motorrean.
«Arras polita eta duna haundiak dituelako» aukeratu zuten Huartek eta lagunek Murzuq motorrean ibiltzeko. Bozpasei hilabete lehenagotik ekin zioten prestaketei: «han sartzeko baimenak eta hainbat gauza behar dira. Desertua ongi ezagutzen duen bat bagenuen, baina erraza da galtzea. Pasabide zail batzuk ere badaude eta ikasten denbora nahiko pasatu genuen», adierazi digu. 20 lagun izan dira espedizio honetan parte hartu dutenak, 13 motorrarekin, eta gainerakoak hiru kamioitan janaria, edaria, gasolina... garraiatzeko.
Kamioigidariak otsailaren 10ean abiatu ziren Libiara eta motorzaleek hilaren 19an hartu zuten Bartzelonan Libiako hiriburua den Tripolirako hegaldia. Ordurako hasiak ziren mugimenduak Libian, baina Huartek kontatu digunez, «kamioigidariak lehenagotik joan ziren, eta Tunez eta Libia gurutzatzean dena lasai ikusi zuten. Horregatik erabaki genuen joatea».
Hegazkina hartu zuten egunean ailegatu ziren Sabhara, eta handik 100 kilometrotara dagoen kanpin batean pasatu zuten gaua. Kanpinerako bidean somatu zituzten lehendabiziko protestak: «mikrobusean gindoazela, Gaddafiren aldeko gazte batzuk aurkitu genituen oihuka. Lehenbizian ez ziguten utzi pasatzen eta sustoa hartu genuen. Baina gero utzi ziguten».
Biharamunean abiatu ziren Murzuq-era. Sakelekoak ez zebiltzala ere konturatu ziren [Gaddafik komunikazioa moztu zuen], baina gainerakoan deus berezirik ez. Igandetik ortzegunera, otsailaren 20tik 24ra, bortz etapa egin zituzten: «arras gustura ibili ginen». Baina ortzegun arratsaldean, sakelekora etxekoen mezuak ailegatzen hasi ziren «Libia gerra zibil baten atarian zegoela eta atera behar genuela erranez», azaldu digu. Orduan sentitu zuen «beldurrik haundiena, «etxetik egoera larria zela erran eta biharamunean ezin komunikatuz genbiltzala ikusita».
300 kilometrotara zuten lehenbiziko herrira hurbildu eta hango sakelekoak erosi zituzten etxekoekin eta Espainiako Enbaxadarekin harremanetan jartzeko. Hortik aitzinera, Aljeliarantz abiatu ziren. Kostata, baina lortu zuten Libia eta Aljelia arteko muga zeharkatzea: «gero jakin dugu muga horretatik azken 20 urteotan ez dela turistarik atera», dio gazteak. Behin Aljelera ailegatuta Euskal Herrirako hegazkina hartu zuten motorgidariek, eta kamioigidariak ere etxera abiatu ziren.
Iragarri bezala, martxoaren 1ean itzuli ziren etxera, baina ez hasierako asmoa beteta: «helburua bi basamortutan ibiltzea zen, eta bakarra egin genuen». Halere, «esperientzia positiboa» izan dela aitortu digu: «liskarren berririk izan gabe ibili gara, inkontziente, eta hobe». Basamortuan motorrean ibili den lehendabiziko aldia izan da beretzat, baina errepikatzeko prest ikusi dugu. Hori bai, «gauzak lasai daudenean». Orain, enduro modalitatean parte hartuko duen Espainiako txapelketa du jomuga.