Inauterietako egun ofizialekin bat eginez, martxoko lehendabiziko asteburuan ospatuko dira inauteriak Urdazubin.
Halere, eskolako neska-mutikoak izanen dira inauteriak ospatzen lehendabizikoak. Martxoaren 4an, ortziralarekin, eginen dute. Bazkalondoan mozorroak jantzi eta kalejiran ibiliko dira. Zugarramurdikoekin batera ibiltzen direnez, urte batean han eta hurrengoan hemen egiten dute kalejira. Aurten Zugarramurdin eginen dute.
Gazteak igandetik aitzinera
Gazteek igandean, martxoak 6, hasiko dituzte inauteriak. Goizean soziedadean gosaldutakoan, mozorrotu eta Dantxarinearako bidea hartuko dute. Bentaz bentaz pasako dute eguna trikitilari eta panderojoleekin. Gauean, herritar guziendako pintxoak izanen dira eta Modesto akordeoilariarekin dantzaldia ere izanen da.
Astelehenean eta asteartean, martxoak 7 eta 8, 10:00etan bilduko dira. Neskak baserritarrez jauntzita, eta mutilak galtza zuriekin, zinta gorri eta berde eta kaskabelekin. Bi egunetan etxez etxe ibiliko dira eta gauez pintxoak izanen dira herritar guziendako. Bi egunotan ere, Modestorekin dantzaldia izanen da.
Gonbidapen berezia egin diete gazteek herritarrei gauetan emanen diren pintxoak denendako izanen direla adieraziz. Horrez gain, igande gauean denak mozorrotuta agertzera ere animatu dituzte.
HERRITARREI DEIA
Igandean, martxoak 6, gauean herrira agertuko diren guztiei mozorrotuta etortzeko gonbidapena egin diete gazteek. Horrez gain, gauetan eskainiko diren pintxoak denendako izanen direla ere nabarmendu dute.