“Euskal Herriko pintura, 50 urte” erakusketa zabalik dago urte osoan Urdazubiko monastegiko klaustroan. 300 artelan baino gehiago daude ikusgai eta bertatik hamar mila lagun baino gehiago pasatu dira 2010 urtean, Otxondo Evenements taldeko Marc Etcheverry arduradun eta sustatzaileak abenduaren 14an egindako balantzean aipatu duenez.
Margo erakusketan gaur egungo hamar margolarien lanak ageri dira: Jose Luis Zumeta, Christine Etchevers, Gonzalo Etxebarria, Patxi Aranoa, Pier, Jose Maria Apezetxea, Roger Bravard, Aitor Mendizabal, Irkus Robles eta Michel Hacala. Eskultoreei dagokienez, klaustroan Aitor Mendizabal, Tista, Tomas Fischer, François Marty eta Eduardo Iturralderen lanak paratuak daude.
Azaroaren 30etik aitzinera, gainera, Iñaki Ruiz de Eguino eskultorearen bi lan ere paratu dira, “saltzen diren arte”, Ruiz de Eguinok berak monastegian azaldu zuenez. Zehazki, “Levántate”, 3.000 kilo dituen altzairuzko eskultura paratua dute monastegiaren kanpoko aldean eta “El nacimiento del cubo”, 450 kilokoa eta hau ere altzairuan egina, klaustroko patioan ezarri zuten.