Zeharbideak hizpide izaten segitzen du. Izan ere, Nafarroako Justiziako Auzitegi Nagusiaren Administrazioarekiko Auzien Salak bertan behera utzi du berriz ere Dantxarineako zeharbidea egiteko proiektuaren esleipena. Proiektua 2007an adjudikatu zuen Udalak, Santiago Villares alkatearen ebazpen bidez, eta VS Ingenieria y Urbanismo SL enpresari esleitu zitzaion.
Proiektuarekin kaltetuak izan diren bi herritarrek, ordea, epaitegietara eraman zuten afera, eta auzitegitik etorri den azken erantzuna da proiektuaren esleipena baliogabetzat jo duena. Salaketa paratu zuten bizilagunek zeharbidea lehengora itzultzea eskatzen dute, baina obrak eginak dira eta joan den urteko azaroan inauguratu ziren.
Gogoratu behar da, salaketa paratu zuten bi bizilagunen lehen apelazioa ez zela onartua izan, baina berriz ere errekurtsoa aurkeztu eta arrazoia eman zien epaitegiak. Joan den urteko abenduan, zeharbideko urbanizazio lanen adjudikazioa bertan behera utzi zuen Nafarroako Justizia Epaitegi Nagusiak, kontratazio prozeduran akatsak zeudelakoan. Gisa berean, bi auzotarrek salatu zutenez, «zeharbideak trafiko arazoak ez ditu moldatzen, eta autoak zona komertzial jakin batera bideratzen ditu, bertze batzuk bazterrean utziz».
Baina Udalak errekurtsoa aurkeztu zuen eta uztail hondarrean arrazoia eman zion Nafarroako Justizia Epaitegi Nagusiak. Orain, baina, berriz bertan behera gelditu da 2007ko urriaren 10ean alkateak sinatutako ebazpena. Urriaren 4an onartu zen azken sententzia.
«Akatsak» kontratazioan
Epaitegiaren urriko sententziaren arabera, zeharbideko lanen adjudikaziorako txostenean, «aktuazio batzuetan hutsunea antzeman daiteke», hau da, «ez-betetze formalak eta hainbat gabezia daude aurkeztutako dokumentazioan». «Identifikatutako aurrekontu kredituaren erreferentziarik ez dago» eta «espedientearen tramitaziorik ere ez dago», beti ere sententzian ageri denez.
Badirudi, urriaren 4ko azken sententzia behin betikoa dela.
«Ulertu ez, baina onartu behar»
Auzitegiaren azken sententziaren aitzinean, Santiago Villares alkateak zera adierazi dio TTIPI-TTAPAri: «aitzineko idazkariak egin ez zuen txostenagatik kondenatu dute adjudikazioa. Horregatik zigortzea ez dugu arras ongi ulertzen, baina onartzen dugu, bertzerik ezin dugulako egin».
Proiektua egiteko Ingenieria y Urbanismo SL enpresarekin egindako kontratua argitu beharko dela ere adierazi du Villaresek: «bere garaiain egindako lanagatik ordaindu zitzaiona onargarria den ala ez ikusi beharko da».