Komertzioen kasuan, eragina handiagoa izan zen arratsaldean. Konparazio batera, goizean, Lesakako denden eta ostatuen % 80 itxi zituzten eta arratsaldean ia denak itxi zuten atea. Baztanen ere goizean komertzio batzuk ireki zituzten, baina arratsaldean ia dena itxi zuten. Beran ere, goizean komertzioak ireki zituzten, eta arratsaldean itxi.
Industriari dagokionez, Haritz Bereau LAB sindikatuko ordezkariak jakinarazi duenez, Berako Savera enpresa itxi egin zuten eta Zalaingo Arcelor lantegian ere ia %100ekoa izan zen jarraipena. Funverako kasuan, komiteko kideek grebarekin bat egin zuten, eta langileen erdiak baino guttiagok ere bai; Berako Maderas Mejoradas eta Verkol enpresetan, berriz, % 40ko jarraipena izan zuen grebak. Martiko eta Alco enpresetan, ordea, normaltasunez lan egin zuten.
Donezteben, Malerrekako enpresarik handiena den Mariezkurrena enpresa itxi egin zuten.