Nafarroako Sokatira Txapelketako lehen txapelak banatuko dituzte larunbatean Lesakan

Ttipi-Ttapa 2026ko azaroaren 6a

Beti Gazteko emakumeak Donezteben jokatu zen lehen jardunaldian. Tiraldi guziak irabazi zituzten eta horretan saiatuko dira larunbatean Lesakan, txapela janzteko.

Nafarroako sokatira txapelketako lehen tiraldiak urriaren 25ean egin zituzten Doneztebeko Ezkurra pilotalekuan. Gizonezkoen (zortzinaka, 620 kiloz beheiti) eta emakumezkoen (seinaka, 390 kiloz beheiti) lehen jardunaldia jokatu zuten eta bietan Beti Gazteko tiralariak gailendu ziren tiraldi guztietan. Orain, kategoria horietako bigarren jardunaldia eta finalak jokatuko dituzte azaroaren 7an, Lesakan, hain zuzen. Lehen jardunaldian ikusitakoaren arabera, etxeko taldeak izanen dira txapelak janzteko faborito, baina aitzinetik lana gogotik egin beharko dute. Larunbatean 17:00etan hasiko da jardunaldia Lesakako udal pilotalekuan.

Gizonezkoen (zortzinaka 620 kilo) eta emakumeen (seinaka, 390 kilo) bigarren jardunaldia eta finalak jokatuko dituzte

Emakumezkoetan sei talde ariko dira: Beti Gazterekin batera, Berriozar, Txantrea, Amaiur, Araxes eta Antsoain. Gizonezkoetan, berriz, hiru talde bakarrik izanen dira goma gainean: Beti Gazte eta Txantrea A eta B.

Txapelketa mistoa azaroaren 14an Antsoainen

Gizonezkoen eta emakumeen txapelak banatu ondotik, txapelketa mistoaren txanda izanen da. Azaroaren 14an jokatuko dute Antsoainen. 560 kiloko kategorian ariko dira zortzinaka eta Beti Gazte izanen da eskualdeko ordezkari bakarra. Lesakarrekin batera, Antsoain eta Txantrea lehiatuko dira.

Kirola Baztan Bortziriak Amaiur Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun