Ikastetxe publikoetako etapa guzietan, hau da, haur eskoletan, haur, lehen eta bigarren hezkuntzetan, batxilergoan eta lanbide heziketako erdi mailan geletako ikasle kopurua jaustea eskatzen dute. Zertarako? Ba, «ikasle bakoitzarentzat arreta pertsonalizatuagoa eta zuzenagoa izateko, inklusio erreal eta praktikoa izateko geletan, ikasle guzien beharrei hobeki erantzuteko, eta hezkuntza publikoaren kalitatea hobetzeko eta sendotzeko».
Nafarroako Parlamentuko araudiaren arabera, guttienez hautesle erroldaren % 1en sinadurak bildu behar dira herri ekimen legegile bat tramitatzeko, eztabaidatzeko eta bozkatzeko. Hala, kasu honetan, guttienez, 7.000 sinadura bildu nahi dituzte ikasleen ratioak legez murriztu ahal izateko.
Eskualdeko ikastetxeetan sinatzeko aukera izanen dela adierazi dute. Oraingoz, Baztan, Bertizarana, Bortziriak, Malerreka, Urdazubi eta Zugarramurdiko ikastetxe publikoetan, eta Leitza eta Aresoko eskoletan bat egin dute ekimenarekin eta azaroaren 6a izanen da sinatzeko azken eguna. «Adinez nagusia bazara eta hezkuntza publikoan sinesten baduzu, ondoko egunetan hurbildu zure ikastetxera eta sinatu», adierazi dute.