Gizonezkoak zortzinaka eta emakumeak seinaka ariko dira, 11:30ean hasiko den jardunaldian
Gizonezkoak zortzinaka (620 kilo) eta emakumeak seinaka (390 kilo) lehiatuko dira eta Doneztebeko Ezkurra pilotalekuan urriaren 25ean, igandean 11:30ean hasita eta Lesakan, azaroaren 7an, larunbatean 17:00etan hasita, jokatuko dituzte bi jardunaldiak. Lesakan, ligaxkako lehen bi sailkatuen arteko finalak jokatuko dituzte.
Gizonezkoetan, hiru talde bakarrik ariko dira: Beti Gazte, Txantrea A eta Txantrea B. Emakumezkoetan, berriz, sei talde izanen dira: eskualdekoak bi izanen dira, Amaiur eta Beti Gazte. Beraiekin batera, Antsoain, Araxes, Berriozar eta Txantrea ariko dira.
Txapelketa mistoa Antsoainen azaroaren 14an
Txapelketa mistoa azaroaren 14an, larunbatean, 17:00etan hasita Antsoainen jokatuko den jardunaldi bakarrean erabakiko da. 560 kiloko kategorian ariko dira zortzinaka eta Beti Gazte izanen da eskualdeko ordezkari bakarra. Lesakarrekin batera, Antsoain eta Txantrea lehiatuko dira mistoan.
Joan den urtean txapel guzien jabe egin zen Beti Gazte eta aurten ere horretan saiatuko da faborito izanen den Lesakako taldea, nahiz eta hainbat tiralari berri izan.